TANGANING masyerto na rehistrado an mga aki sa syudad nin Naga, pigtalaan kan lokal na gobyerno an free child birth registration sa Nobyembre 15, alas-8:00 sagkod alas-3:00 nin hapon sa City People’s Hall.
Segun ki City Administrator Elemer Baldemoro, Executive Director kan City Children’s Affairs Office, basic right kana ki na magkaigwa nin pangaran, nationality asin iba pang indentification.
Apwera digdi, magagamit an birth certificate kan aki sa enrollment sa eskwelahan asin sa iba pang katuyuhan para sa aki.
Aminado an dating konsehal na dakol pang aki sa syudad na dae pa rehistrado sa ibong kan mobile child birth registration na piggigibo sa mga barangay kan City Registrar’s Office.
Huli digdi, pigmarhay kan lokal na gobyenro na ikonduser an aktibidad taon-taon katakod kan National Children’s Month celebration.
Libre asin bukas sa gabos an aktibidad, lalo na sa mga adult na kaipuhan an late registration.
(Paulo S. Delos Santos, CEPPIO.)
