BILANG na an aldaw kan mga kaskaserong tsuper sa syudad nin Naga.
Ini an pigsaysay ni Renne Gumba, executive director kan Public Safety Office, pagkatapos na ilatag niya sa atubangan kan prensa an planong paglaag sa gilid kan mga mayor na tinampo nin mga camera na igwang kakayahan madeterminaran an rikas kan mga nag-aaging behikulo.
Segun ki Gumba, pighahalat lang nindang matapos an kampanya sa pagpapahiwas nin mga tinampo o road clearing operations saka ninda popoonan an paglaag nin mga speed limit signages.
Pigsaysay pa ni Gumba na an lambang tinampo, orog na kun klasipikadong mayor na dalan arog kan Magsaysay Avenue asin Panganiban Drive, igwa nin speed limit para sa mga behikulo.
Kasabay kan paglaag nin mga speed limit signages iyo an procurement asin installation kan mga CCTV cameras na igwa nin kakayahan na magsukol kan rikas o speed kan mga nagdadalagan na mga lunadan sa lugar asin an pagbakal nin iba pang mga gadgets na igwa nin kaparehong katuyuhan asin gagamiton sa mga lugar na dae nin camera.
Dapit sa mga depektosong traffic lights, sinabi ni Gumba na on-going na an procurement process para sa pagdisponir nin mga bagong traffic lights kaibahan na an pag repair sa mga kaya pang hirahayon.
(Jason B. Neola, CEPPIO.)
