Kasabay kan pagpasalamat huli kan paghingowa na makatabang sa liwat na pagparambong kan lokal na ekonomiya, pig-omaw ni Alkalde Nelson Legacion an liderato kan Metro Naga Chamber of Commerce and Industry (MNCCI) huli sa espwerso kaini na ibosol an Bicol Business Month (BBM) dawa yaon pa ngani sa panahon nin pandemya.
Sa natatapos pa sanang opening ceremony kan BBM na tampok an Best of Bicol event, pigtawan nin du-on kan alkalde sa saiyang mensahe na dae kaipuhan na mabuhay sa takot an mga Nagueño huli kan Covid-19. Alagad, pigtawan du-on kan alkalde na padagos na nalilikayan an pagsakat sa numero nin mga kaso kan Covid-19 huli kan higot asin lagduan na vaccination campaign kan LGU sa tabang kan mga ahensya nin gobyerno asin pribado.
Sinabi kan alkalde na sagkod sa mga aldaw na ini, poon kan itolod an dakulang selebrasyon kan Peñafrancia fiesta, limitado sana sa single digit an numero kan Covid-19 cases. Boot sabihon, kontrolado an paglakop kan virus huli ta an mga Nagueno, protektado.
Sa piggibong pormal na pagbukas kan BBM sa SM City Naga, ipinahayag ni Emy Salgado, chairman kan Best of Bicol event na bako sanang mga bagong teknolohiya, serbisyo asin produktong gibo sa paagi nin Bicolano ingenuity an maheheling kan publiko, kondi magin man an mga sikat na Bicolano artists sa manlaenlaen na lado asin panahon.
(Jason B. Neola, CEPPIO.)
