Pinagmarhay ni Alkalde Nelson Legacion, chairman kan Naga City Price Coordinating Council (NCPCC) na suspendiron poon ngonian na aldaw, Huebes, Marso 8, an pinagpapaotob na price ceiling para sa karneng orig na pinagpapabakal sa Naga City Public Market asin sa iba pang merkado sa laog kan ciudad nin Naga.
Marurumdoman, pinag-paotob an price ceiling bilang mandato kan sarong resolosyon na pighaman kan NCPCC katabang an sektor nin konsumidor, representante kan mga paratienda nin karne, asin an Department of Agriculture sa paagi kan National Meat Inspection Service (NMIS).
Tinugotan kan alkalde an suspensyon sa price ceiling pagkatapos na maobserbaran na padagos na nagsasakat an farm gate price kan orig, alagad dae nakakabwelo an mga paratienda nin karneng orig sa pagtao nin tamang precio huli kan pigpapaotob na price ceiling sa nasambit na produkto.
Resulta kan sitwasyon na iyan an pagsara kan mga tiendahan nin karne sa mercado dara nin pagkapierde mantang an pigtatago kan iba an pagtienda kan produkto huli ta dae kayang otobon an price ceiling na ipinagmamando kan NCPCC Resolution No. 1 Series of 2021.
Sa ikaduwang resolosyon kan NCPCC na sinuspendir an price ceiling, ipinahayag an padagos na pagsakat kan farm gate price poon P170/kg pasakat sa P190/kg sagkod na aboton an P200-P220/kg base sa pinakahuring report kan monitoring teams kan City Veterinary Office asin NMIS.
Saro sa kawsa kan padagos na paglangkaw kan farm gate price an nagdidikit na supply kan orig huli kan African Swine Fever na nagin dahilan tanganing magsara an dakol na commercial pig farms sa probinsya.
Nagin mas makanos pa an sitwasyon huli kan operasyon nin mga mobile swine traders hale sa ibang rehiyon na nagoopresir nin mas halangkaw na farm gate price, resulta kaini, nagiging kaagaw sinda kan lokal na swine traders na taga-digdi sa satuyang lugar.
An swine traders na gikan sa ibang lugar igwa pa nin kakayahan na magbayad nin sagkod sa P500 sa siisay man na makakatukdo sainda nin orig na pwede nindang bakalon, sarong bagay na dae kaya kan satuyang mga paratienda nin karne sa merkado publiko.
