Duwa sagkod sa apat pang public schools an bubukasan kan lokal na gobyerno kan syudad nin Naga sa masunod na taon huli kan padagos na pagdugang kan kaakian na boot makapag-eskwela sa public schools.
Ibinuyagyag ni Alkalde Nelson Legacion na an plano minauyon sa kahagadan kan Department of Education sa syudad nin Naga para sa dugang na classrooms. Sinabi ni Schools Division Superintendent Mariano de Guzman na huli kan nagsasakat na numero nin mga enrolees sa Don Manuel I. Abella Central School sa Cararayan, asin Naga City School of Arts and Trade sa Sabang, kaipuhan magtugdok pa nin mga classrooms.
Isinaysay ni Legacion na an pagpatindog nin mga bagong eskwelahan yaon sa saiyang mga priority programs, siring kan apat na mga eskwelahan na pigmukna sa laog kan saiyang primerong termino bilang alkalde, an Yabu Elementary School, Sta. Cruz National High School, Balatas National High School, asin an San Isidro National HS.
Plano kan syudad na duwa ngonang eskwelahan an enot na papatindogon asin iyan mangyayari sa Sitio Salunguigui sa Barangay Cararayan na harani sa mga settlement areas kan syudad, asin sa Barangay Mabolo na aapudon Mabolo National High School. Sa report na ipinaabot sa alkalde, pwedeng magkaigwa tolos nin 200 na mga paraadal an itutugdok na eskwelahan sa Mabolo.
(Jason B. Neola, CEPPIO.)
