MAOGMANG pigpasalamatan ni dating Besi-Presidente Leni Robredo an syudad nin Naga sa padagos na pagromdom kaini sa death anniversary kan saiyang esposo, dating DILG secretary Jesse M. Robredo.
Kasoodma, Agosto 18, iyo an ika-10 taon kan pagkagadan kan opisyal na nanirbihan bilang alkalde sa syudad nin Naga sa halawig na panahon asin pigmimidbid bilang ama kan marhay na paggobernar sa Naga.
Sa saiyang mensahe sa ginibong tiripon, pigtawan du-on kan dating besi-presidente an saiyang pagpapasalamat sa mga taong padagos na pigroromdom an saiyang esposo dawa sa halawig nang panahon na nagtalikod ini sa kinaban.
“Alagad, boot ko man na pasalamatan bako sana an padagos na pagpadangat nindo ki Jesse. Gusto kong pasalamatan man an padagos na pagpaorog nindo sa legasiyang iwinalat niya. Para sa sakuya, importanteng marhay an pagiging toltol na serbidor kan sarong tao. Huli ta an pinakasukol kan paggobernar bako si mga nahaman, kondi an pagiging marhay mismo kan sarong serbidor,” sabi pa Leni.
Sinabi pa kan dating besi-presidente na an pagpogol nin pwesto sa gobyerno dae pigmamana, kondi pigpapagalan sa paagi nin toltol na trabaho asin nin huli kaiyan sinabi niya na bakong imposible na may magbutwang mga lider o serbidor na mas marhay pa kesa sa saiyang agom.
“Asin nagtutubod ako na sa syudad nin Naga, naipaheling na an bagay na ini,” sabi pa kan besi-presidente.
Pigsaysay pa kaini na dakol siyang pig-atubang na mga challenges asin threats kan siya besi-presidente pa, alagad an marhay na sukolan nin pagserbi asin legasiya kan saiyang esposo an nagserbing kusog tanganing ibosol an padagos na piggibo nin tama asin marhay.
(Jason B. Neola, CEPPIO.)
