HALAT na kan City Treasurer’s Office sa City Hall kan Naga asin kan Market Enterprise and Promotions Office (MEPO) sa Naga City People’s Mall an mga transient vendors na boot magtyenda sa laog kan syudad nin Naga ngonyan na Peñafrancia fiesta.
Ipinahayag ni Ramon Florendo, pamayo kan Trade Events and Vending Committee kan syudad, na tatawan nin application forms kan nasambit na mga opisina an mga negosyante tanganing maklaro kun saen sinda mapabakal kan saindang mga paninda, kun anong klaseng paninda an saindang ipapabakal, asin kun sagkod nuarin sinda matyenda sa laog kan syudad.
Pagkatapos kan application forms, madalagan an mga aplikante sa barangay hall na nakakasakop kan lugar na pagtyetyendahan para sa barangay clearance asin tanganing aramon kun an piniling lugar pwedeng tyendahan.
An mga transient vendors pwedeng tugotan na magtyenda poon Agosto 15 hanggan Oktubre 15, ngonian na taon o poon Seytembre 9 sagkod Setyembre 18, ngonian na taon. An tesoreriya masingil sa mga transient vendors para sa mayor’s permit, kun gurano man, depende sa mapipili ninda sa duwang nasambit na peryodo o lawig nin aldaw.
Segun ki Florendo, kabali an bulan nin Agosto sa peryodo nin pagtyenda sa Naga kan mga transient vendors huli ta sa laog kan sinambit na bulan igwa na nin mga dayong paratienda na boot magpwesto sa laog kan syudad.
Laen kan mga lugar sa barangay, an parking spaces sa J. Hernandez Avenue (dating Igualdad St.), sa likod kan NCPM, pigheheling na papatyendahan liwat sa mga transient vendors duwang aldaw bago mag-abot an mismong kaaldawan kan pyesta tanganing malikayan an saindang pagpwesto sa mga tinampo.
An presensya kan mga dayuhan na paratienda dugang na kolor asin kaogmahan sa laog kan syudad huli kan pag-abot kan mga produktong bihira sa pagheling kan mga taga-Naga laen pa kan mga bisitang mabarakal.
Alagad, pigtawan du-on ni Florendo na pigpapaotob man giraray kan syudad an mga panundon sa pagpangataman kan salud kontra sa Covid-19 asin an mga reglamentong ipinapotob sa road clearing operations.
(Jason B. Neola, CEPPIO)
