Sa primerong pagkakataon, nakatalaan na gibohon an duwang magkasabay na vaccination program para sa kaakian sa Byernes, Nobyembre 5, ngonian na taon. Pigpiling pilot areas para sa pediatric vaccination an Naga City Mega Vaccination Site (Jesse M. Robredo Coliseum) asin an Bicol Medical Center.
Segun ki Dr. Joey Rañola, Infectious Disease specialist kan hospital, target ninda an 500 na mga aki sa laog kan enot na aldaw kan mass vaccination.
Boot ipaabot kan doktor sa mga magurang na kaipuhan igwa nin certification gikan sa pediatrician an saindang mga aki kun igwa nin comorbidity. Saro pang requirement tanganing matawan nin vaccine an siisay man na aki, kaipuhan igwa nin parent’s consent.
Sa lado kan syudad nin Naga, pigpahayag ni Dr. Butch Borja, city health officer, na an mga babakunahan na aki kaipuhan yaon sa edad poon 12 hanggan 17 anyos. Sinabi pa kaini na Pfizer asin Moderna vaccines an gagamiton siring kan pig-aprobaran kan Bureau of Food and Drugs Administration (BFAD).
An barakunahan na pigbobosol kan syudad pigpaplanuhan na gibohon sa mga public schools sa maarabot pang aldaw para sa mas mahiwas asin lagduan na coverage kan programa. Pigpahayag ni Borja na pigheheling ninda na pwedeng aboton sa 10,000 sagkod sa 12,000 na mga aki an mabenepisyo kan nakatalaan na barakunahan na regular nang gigibohon sagkod sa makumpleto an numero kan mga kaakian sa laog kan syudad.
Isasabay na man sa pagbakuna an mga magurang o guardians na dae pa bakunado tanganing masyerto an saindang pagiging ligtas.
Update sa vaccination program kan syudad, sa pinakahuring datos (October 25, 2021) sa 209,107 na Nagueño, 62,148 an nagresibe nan in first dose mantang 47, 059 an fully vaccinated.
