SALUDO SA METRO NAGA PESO! — Pigrekonusir kan Department of Labor and Employment an Metro Naga PESO bilang Outstanding Public Employment Services Office sa bilog na rehiyon Bicol. Pigresibe an award mismo ni Metro Naga PESO Manager Roderick Reforsado durante kan 2025 Regional Search for Best PESO awarding ceremonies sa Casablanca Hotel, ciudad nin Legazpi kasuodma, Hulyo 10.
Angat an opisina kan empleyo sa gobyerno lokal kan Naga sa referral and placement services asin placement efficiency na nakaabot nin lampas 90 porsyento magin sa labor market information.
Nagsalming ini sa hureng datos kan Philippine Statistics Office, na 95 porsyento kan labor participation rate sa ciudad an employed, mantang 5 porsyento sana an unemployed. Susog ini sa ginibong 2024 CDMS Peliminary Results for the City of Naga, Camarines Sur.
Segun ki Reforsado, pigsisiyerto kan Metro Naga PESO na nauutob an mga mandatong serbisyo kan opisina asin naisusumiter an hinahagad na datos o dokumentos sa DOLE sa tamang oras.
Namantener ni Reforsado an nasambit na award puon taon 2022 kan magasumer siya bilang pamayo kan opisina.
Huli kaini, pambato liwat an Metro Naga PESO sa nasyunal para sa parehong award kan mga independent component cities na ipigtatalaan tuyong bulan nin Oktubre.
Congratulations, METRO NAGA PESO!
Written by Rizza Santos (CEPPIO).
