Sarong probisyon sa ordinansa kan Naga dapit sa curfew, City Ordinance 2020-046, an pighira tanganing isusog sa bagong quarantine classification ngonian kan syudad na yaon na sa general community quarantine (GCQ).
Imbes na ipaotob pa an curfew poon alas 9:00 nin banggi sagkod alas 4:00 nin aga base sa City Ordinance 2020-046, pighahagad kan bagong ordinansa na an curfew ipaotob poon alas 12:00 nin matanga sagkod alas 4:00 nin aga.
Pigsaysay ni Konsehal Joselito S.A. del Rosario, kagpadreno kan amendatory ordinance, na an bagong batas naghohorot pang tawan nin dugang na sarong oras an mga trabahador/empleyado nin mga establisemyento na nagsasara alas 12:00 nin matanga. Ini, tanganing igwa sinda nin bastanteng oras na makabyahe pasiring sa saindang mga harong o residenya.
An bagong ordinansa pig endorso ni del Rosario sa Sangguniang Panlungsod kan Martes, Nobyembre 2, asin pigpasar sa konseho kan aldaw man sanang idto mismo. An City Ordinance 2021-081 pig aprobaran ni Alkalde Nelson Legacion pagkaaga mismo (Nobyembre 3) pagkatapos pag orolayan sa Sanggunian.
An sarong oras na peryodo, segun sa ordinansa, i-oonra o itutugot sana kun an trabahador o empleyado makakapagpresentar nin ID sa mga nagsisitang awtoridad, for verification purposes, na pigpapaheling an saiyang empleyo asin address kan employer.
Mantang pigpapaotob an curfew, ipinagbabawal sa siisay man an magtenir sa mga pampublikong lugar siring kan mga kalye o tinampo, parks asin mga plaza, kawatan o playgrounds, mga open spaces nin mga subdivision, mga edificios asin pasilidad na sarado o mayo nin transaksyon sa pagkabanggi.
