Civic and religious activities durante kan nobenaryo sa Mahal na Ina

PIGTAWAN nin du-on ni Rev. Fr. Juan Pablo Carpio, parish priest kan Basilica Minore de Peñafrancia, na dae nagsisiriblagan an mga civic asin religious activities sa syudad nin Naga sa kada pagselebrar kan Penafrancia firsta.

Pigtaong halimbawa ni Carpio an mga civic events na gigibuhon sa Setyembre 9, aldaw nin Traslacion sagkod Setyembre 18, aldaw kan pyesta. Huli kaini, mayo nin ribaraw sa parte kan mga bisita na mapasiring sa syudad dahil kan nagkakaoroyon na aktibidad.

An syudad nin Naga midbid bilang pilgrim capital sa Bicol susog sa Presidential Proclamation No. 33, Series of 2010.

Pigsabi pa kan padi na bastante an pag-avail kan mga bisita sa mga hotel asin iba pang mga serbisyo asin produkto na masusumpungan sa laog kan syudad na madara nin karahayan sa dalagan kan ekonomiya kan Naga kaya dae na man kaipuhan na mag-organisar nin mga aktibidad na dae kontra sa selebrasyon kan pyesta asin novenario.

Marurumdoman pigkondenar ni Mayor Nelson Legacion asin kan mga kapadian an Beer Plaza and Search for Hot Bodies 2022 na nakatalaan sa Setyembre 10, an ikaduwang aldaw kan nobena. An Beer Plaza and Search for Hot Bodies 2022 mayo nin permiso sa lokal na gobyerno.