HULI kan pigheheling na mas dakol na tao an madagsa sa syudad nin Naga huli kan selebrasyon kan Peñafrancia fiesta sa Setyembre, ngonian na taon, pigmarhay kan lokal na gobyerno na suspendiron an paglaog sa trabaho asin sa mga eskwelahan sa Setyembre 9, Biyernes, an talaan na aldaw kan traslacion procession.
Pigsaysay ni Allen Reondanga, pamayo kan City Events, Protocol, and Public Information Office (CEPPIO), na posibleng magsakat sa 10 sagkod 15 porsyento an bilang kan mga deboto, peregrino, bisita, asin mga turista ngonian na pyesta kun ikukumpara sa numero kan mga taong nag-abot sa laog kan syudad kan nakaaging taon.
Segun sa oficina kan Arts, Culture, and Tourism Office (ACTO) kan gobyerno lokal, sa pagbunkaras pa sana kan bulan nin Agosto, reserbado na an mga hotel rooms sa laog kan syudad para sa mga madayo sa Naga sa maabot na pyesta. Boot sabihon, dakol an mapasiring sa Naga sa pirang aldaw nin selebrasyon.
Deklarado man na dae nin eskwela sa Setyembre 14 an aldaw kan regional scouts parade, drum and bugle corps, asin drum xylophone and majorettes competition; Setyembre 15 aldaw kan civic parade asin float competition, asin Setyembre 16 aldaw kan Bicol Regional Military parade, asin Setyembre 19, Lunes, an primerong aldaw pagkatapos kan pyesta. An selebrasyon kan pyesta ngonian na taon gigibohon sa petsa 17.
(Jason B. Neola, CEPPIO.)
