MANTANG pighahalat pa an direktiba kan opisina nasyonal kan Commission on Elections (COMELEC) katakod kan campaign period para sa Barangay and SK elections na pig-move sa Oktubre 30, 2023, may pagirumdom na si Atty. Maico Julia Jr., election officer, kan syudad nin Naga sa mga makandidato.
Segun ki Julia, pamayo kan COMELEC– Naga, P3.00 per voter an pigtutugot na gastoson para sa kampanya kan mga makandidato sa barangay na may political party affiliation mantang P5.00 sa mga independent candidates.
Pigsabi ni Julia na dawa maninigong non-partisan an nasambit na pirilian, an prescribed expenses na basado sa RA 9006 o Fair Election Act an presenteng pigpapasunod kan COMELEC.
Makalihis an voters’ registration na pigtalaan sa Disyembre 9, 2022 sagkod Enero 31, 2023, gigibuhon an Election Registration Board meeting kun saen maaaraman an consolidated number of voters kada barangay na iyo man an babasehan kan mga makandidato sa saindang campaign expenses.
Apwera kaini, gigibuhon man an candidates’ forum tanganing mapangadalan an mga ini kan election rules, kabale na an mga pigpapangalad arog kan pagdukot nin campaign materials sa government properties, vote buying asin iba pang bayolasyon na may maninigong padusa.
(Paulo S. Delos Santos, CEPPIO.)
