Agriculture – CITY OF NAGA

Update kan DA sa Naga para sa dugang na post-harvest facilities

CEPPIO Naga — Thu, 29 Sep 2022 04:00:51 +0000

PIGHAHALAT na sana kan City Agriculture Office an update kan Department of Agriculture (DA) mapadapit sa iba pang proseso bago an turn-over nin dugang na ekipahes sa Naga City Rice Processing Center na pighahagad kan lokal na gobyerno kan syudad nin Naga.

Kan nakalihis na bulan, aprobado sa Sangguniang Panlungsod session an resolusyon ni City Councilor Melvin Ramon Buenafe, chairman kan Committee on Agriculture, manungod sa paghagad kan lokal na gobyerno sa DA nin sarong rice milling machine asin duwang rice dryers na gagastosan kan ahensya gikan sa taripa na pigsesengil kan gobyerno nasyonal sa rice importers sa nasyon.

Huli digdi, nagbisita an DA kan nakaaging bulan sa processing center sa Barangay Carolina tanganing aramon kun kayang paandaron an mga makina kan power supply sa lugar.

Segun ki Acting City Agriculturist Frank Mendoza, mapapakinabangan kan local rice farmers an rice dryers para sa pagpaalang kan mga paroy na pig-ani ninda durante kan mauran na panahon.

Dugang ni Mendoza, an rice milling machine na hale sa DA, madugang sa eksistedong rice mill sa rice processing center kan syudad.

Pigtawan-doon ni Mendoza, sa laog nin duwa sagkod tolong aldaw nin aranihan, lugi na an paraoma sa mas hababang market value kan basang paroy kaya dakulang bagay an rice dryer para sa marikas na pagpaalang kan paroy sagkod na mamolino asin magin bagas na pwede nang bakalon direkta kan lokal na gobyerno, sa marhay na presyo per kilo, tanganing magamit sa rice distribution para sa senior citizen, queen asin iba pang beneficiaries.

Pigsabi pa ni Mendoza na sa panahon presente pigtutugotan an gobyerno kan ley na magbakal direkta sa local rice farmers nin bagas, dawa dae na iagi pa sa bidding, sa lindong kan RA 11321 o Sagip Saka Act.

Obheto kan lokal na gobyerno sa paagi kan nasambit na opisina na magkaigwa nin toltol na ganansya an mga paraoma sa agrikultura.

(Retrato kua ni Lance Alegre, Paulo S. Delos Santos, CEPPIO.)

District abattoir pigtawan nin ‘meat van’ kan DA

Jason Neola — Tue, 02 Nov 2021 00:50:00 +0000

Pormal nang pig-turn over kan Department of Agriculture (DA) sa Bicol an sarong delivery truck sa lokal na gobyerno kan syudad nin Naga na maserbing dakulang tabang sa pagdara nin malinig, ligtas, asin preskong karne sa 6 na pagtaraed na banwaan kan syudad hale sa district abattoir.

An reefer van, sarong brand-new meat transport vehicle na pigresibe kan syudad sa paagi ni Alkalde Nelson Legacion kan Martes, Nobyembre 2. Personal na pig-intriga ni Regional Executive Director Rodel Tornilla kan DA asin Dr. Alex Templonuevo kan National Meat Inspection Service (NMIS) an van.

Sa paagi kan P1.9-M na pasilidad, piglalaoman na maibobosol na toltol kan district slaughterhouse an pagbyahe nin mga karneng orig, baka, carabao asin kanding na likay sa ano man na bagay o sitwasyon na pwedeng makaapekto sa kalidad kan mga nasambit na produkto.

Pigtawan nin du-on ni Legacion na “sa paagi kan refrigerated van, dae na maikokompromitir o maisasakripisyo an kalidad kan karne huli kan marhay na cold chain management o an mantenidong kaipong temperatura kan nasambit na mga produkto mantang pigbabyahe sa mga banwaan kan Bombon, Camaligan, Gainza, Canaman, Milaor, and Magarao.”

An Naga City District Abattoir nag-ooperar bilang “Double A” district slaughterhouse na kun saen garantisadong an meat products dae kontaminado asin ligtas bilang pagkakan nin tao.

5 na kaso nin rabies infection huli kan pabayang dog owners

Jason Neola — Thu, 23 Sep 2021 18:56:00 +0000

City Veterinary Dr. Junios Elad Jr.

Higot na pigpatanidan ni City Veterinarian Junios Elad Jr., pamayo kan City Veterinary Office kan gobyerno lokal kan syudad nin Naga, an mga residentes na maglikay sa kagat nin ido.

Ginibo kan veterinary doctor an patanid pagkatapos niyang kumpirmaron na igwang limang kaso nin rabies infection sa syudad.

Tinawan du-on ni Elad an peligro kan virus sa salud nin tao huli kan kagat nin ayam na dae pa bakunado. Sa pinakahuring datos kan nasambit na opisina, an barangay kan Concepcion Pequeña, Dayangdang, asin Abella igwa nin tigsararong kaso mantang 2 kaso an pigrehistro sa Barangay Pacol.

Saro sa lima an pigbawian nin buhay pagkatapos na ipasipara sana an pagkagat saiya kan sadiri niya man sanang ataman asin dae naghingowang magpa ineksyon nin anti-rabies vaccine. Piglinaw ni Elad na duwang klase an anti-rabies vaccine, saro para sa tao asin separado man an sa ido.

An rabies infection, segun pa sa doktor, syento porsyentong nalilikayan na magkawsa nin kagadanan o kasakitan sa tao kun naaagapan tolos sa paagi nin anti-rabies vaccination. Pigpaliwanag man kaini na dae na mararahay sa rabies infection an sarong tao kun ipapasipara kan biktima an pagresibe nin bakuna sa laog nin tolong semana sagkod sa tolong bulan.

Pigtawan du-on pa ni Elad na nagigin takot sa tubig an sarong taong positibo sa rabies. Segun sa saiya, laryngeal paralysis o grabeng pagkulog nin halanuhan an pigmamati kan sarong taong biktima nin rabies infection orog na kun nag-iinom nin tubig, asin huli kaini nagkakaigwa nin hydrophobia an pasyente.

Nagtao nin patanid an doktor sa mga dog owners na magin responsable sindang mga para ataman nin mga hayop. Sinabi pa kaini na kun bakunado na an saindang mga ataman, kaipuhan dae pagpabayaan na magbaraybasay sa tinampo tanganing mailikay an saindang mga ataman sa ibang ido na dae pa bakunado.

An CVO seryoso sa canine disease infection campaign na pigbobosol sa paagi nin stray dog elimination o an pagdakop sa mga butas na ido, city-wide anti-rabies vaccination asin dog castration o pagkapon nin mga ido na an katuyuhan makontrol an grabeng pagdakol kan mga ayam.