vaccination program – CITY OF NAGA

Padagos na pagpreparar para sa pyesta asin daeng ontok na pagbakuna sa Naga

CEPPIO Naga — Tue, 02 Aug 2022 10:00:52 +0000

Padagos sa piggigibong preparasyon an syudad nin Naga para sa pyesta kan Nuestra Sra. de Peñafrancia sa bulan na Setyembre ngonian na taon, an ika-312 taon nin pagdebosyon sa Mahal na Ina.

Segun ki Alkalde Nelson Legacion, mantenido kan syudad an pagiging alert level 1 kaini poon kan Marso 1, 2022 sagkod sa presente huli kan hababang kaso nin Covid-19 o bilang nin mga taong nag-positibo sa RT-PCR test. Sa Agosto 15, liwat na dedeterminaran kan National IATF kun ipapadagos an paglaag sa Naga sa alert level 1 status o babaguhon na.

Dawa ngani igwa nin nagkakapirang Covid-19 positive kan mga nakalihis na semana, manonotaran na hababang marhay an Critical Care Facility Utilization Rate kan syudad, bu-ot sabihon, bawas na marhay an pag-gamit kan ICUs, isolation beds, ventilators sa mga health and medical facilities huli ta kadikit na tao an naoolakitan kan virus.

Pigsaysay ni Maria Nelia Benito, an National Vaccination Coordinator kan gobyerno lokal, na padagos sa pagbosol an syudad kan vaccination program kaini. Abot na sa 91% kan populasyon an bilang ngonian kan mga bakunado sa laog kan syudad sa kategoriyang primary series o nagresibe na kan enot na duwang bakuna.

Sa aga, aldaw nin Miyerkules, Agosto 3, nakatalaan na gibohon an mass vaccination sa covered courts kan barangay Panicuason, Carolina, asin San Isidro laen pa kan pigbobosol na vaccination sa SM City Naga poon 10:00 nin aga hanggan 4:00 nin hapon, Lunes hanggan Biyernes.

Segun ki Benito, Nurse 3 kan LGU Naga, higot na pigpapaotob kan administrasyon ni Mayor Legacion an “No Wrong Door” policy o an pagtao nin bakuna sa siisay man na gusto dawa gikan pa sinda sa mga pagtaraed na banwaan kan syudad.

(Jason B. Neola, CEPPIO. Kuang retrato ni Jess Moreno (2019), CEPPIO.)

Principals, head of schools nag-orolay para sa child vax

Jason Neola — Thu, 04 Nov 2021 02:03:00 +0000

Presente si Mayor Nelson Legacion asin an mga school principals

Nagkaoyon kasoodma an lokal na gobyerno kan syudad asin an pamayo kan Department of Education sa Naga kabali na an mga school principals na i-oktaba muna an pediatric vaccination sa Naga City Mega Vaccination Site sa Jesse M. Robredo Coliseum.

Boot sabihon, dae muna gigiboohon an nakatalaan na vaccination sa aga, Byernes, Nobyembre 5, sa mga aki na yaon sa edad 12 sagkod 17 anyos tanganing tawan nin dalan an orientation o pagpasabot sa kaakian kan karahayan kan vaccination program asin pakikipag olay o pagkonsulta sa mga magurang.

Pig-oyonan pa man kan mga head of schools asin principals magin kan mga pribadong eskwelahan na gibohon school-based an child vaccination o an pagbosol nin pagbakuna sa mismong ekwelahan kan aki.

Nagtaong halimbawa si Mayor Nelson Legacion na kun an sarong aki taga Concepcion Pequeña, siya mapabakuna sa Concepcion Pequeña National High School siring man kun taga Barangay Tinago an aki, siya mapabakuna sa Tinago National High School.

Sa sitwasyon kan mga aking nag-aadal sa pribadong eskwelahan, pigsabi kan alkalde na sa saindang eskwelahan sinda mapabakuna, arog kan aki na nag eeskwela sa St. Joseph School School, siya babakunahan sa nasambit na eskwelahan.

Pigpaliwanag kan alkalde na tatawan nin prayoridad sa barakunahan an mga aki na nag eestar sa laog kan syudad nin Naga, pagkatapos na sinda mabakunahan dangan isusunod an mga aking nag eestar sa mga pagtaraed na banwaan.

Pigtawan du-on kan alkalde na mawot kan syudad na makumpleto tolos an pagbakuna sa 70 porsyento kan mga taga-Naga. Ini man an rason kun taano ta boot kan syudad na gibohon an vaccination magin sa mga eskwelahan asin bako lang sa JMR Coliseum.

Sa tahaw kaini, pigtawan pang du-on kan alkalde an nagpapadagos na Barangay Vaccination program, pwera pa kan mga barakunahan na piggigibo sa Naga College, Ateneo de Naga University, asin sa Unibersidad de Nueva Caceres.

Pigsaysay kan alkalde na maibobosol na toltol an child vaccination huli kan marikas, malinaw, asin turuwang na pagplano dapit sa bagay na ini. Sarong group chat kan mga pamayo nin mga pampubliko asin pribadong eskwelahan sa Naga an nakatalaan hamanon para sa paghanda sa mahiwas asin lagduan na child vaccination program.

Naga, BMC pilot areas kan child vax sa Nov. 5

Jason Neola — Wed, 03 Nov 2021 03:45:00 +0000

Sa primerong pagkakataon, nakatalaan na gibohon an duwang magkasabay na vaccination program para sa kaakian sa Byernes, Nobyembre 5, ngonian na taon. Pigpiling pilot areas para sa pediatric vaccination an Naga City Mega Vaccination Site (Jesse M. Robredo Coliseum) asin an Bicol Medical Center.

Segun ki Dr. Joey Rañola, Infectious Disease specialist kan hospital, target ninda an 500 na mga aki sa laog kan enot na aldaw kan mass vaccination.

Boot ipaabot kan doktor sa mga magurang na kaipuhan igwa nin certification gikan sa pediatrician an saindang mga aki kun igwa nin comorbidity. Saro pang requirement tanganing matawan nin vaccine an siisay man na aki, kaipuhan igwa nin parent’s consent.

Sa lado kan syudad nin Naga, pigpahayag ni Dr. Butch Borja, city health officer, na an mga babakunahan na aki kaipuhan yaon sa edad poon 12 hanggan 17 anyos. Sinabi pa kaini na Pfizer asin Moderna vaccines an gagamiton siring kan pig-aprobaran kan Bureau of Food and Drugs Administration (BFAD).

An barakunahan na pigbobosol kan syudad pigpaplanuhan na gibohon sa mga public schools sa maarabot pang aldaw para sa mas mahiwas asin lagduan na coverage kan programa. Pigpahayag ni Borja na pigheheling ninda na pwedeng aboton sa 10,000 sagkod sa 12,000 na mga aki an mabenepisyo kan nakatalaan na barakunahan na regular nang gigibohon sagkod sa makumpleto an numero kan mga kaakian sa laog kan syudad.

Isasabay na man sa pagbakuna an mga magurang o guardians na dae pa bakunado tanganing masyerto an saindang pagiging ligtas.

Update sa vaccination program kan syudad, sa pinakahuring datos (October 25, 2021) sa 209,107 na Nagueño, 62,148 an nagresibe nan in first dose mantang 47, 059 an fully vaccinated.