ANDAM na an gabos para sa nakatalaan na pagsikad kan limited face to face classes sa laog kan syudad nin Naga sa Lunes, Agosto 22, ngonian na taon.

Segun ki Schools Division Superintendent Manny de Guzman, preparado na an gabos para sa luhay-luhay na pagbwelta kan in-person classes poon sa elementary sagkod sa secondary level na sakop kan mga pampubliko asin pribadong eskwelahan.

29 na mga public elementary schools asin 11 na pampublikong eskwelahan sa sekondarya o high school an mapaotob kan face-to-face classes mantang an Concepcion Pequeña High School asin 5 pang public elementary schools an maadaptar nin blended learning system.

Pig asigurar ni De Guzman na hihigotan ninda an pagpaotob kan mga public health protocols sa laog kan mga eskwelahan.  Mayoriya kan mga paratukdo sa laog kan syudad nagresibe na nin bakuna laban sa Covid-19, kabali na an mayoriyang numero kan mga estudyanteng yaon sa elementary asin secondary levels.

Sa ngonian pigkakasibutan an repair asin rehabilitation kan nagkakapirang classrooms asin school buildings, alagad, pigsyerto kan DepEd official na bako ining olang sa pagpoon kan klase sa Lunes.