PASIRING SA pag-otob kan katuyuhan na magin mauswag an lambang Nagueño asin magin makusog na katuwang sinda sa pagdara nin asenso, pig-aadalan ngonian kan opisina ni City Councilor Joselito S.A. del Rosario na pahiwason pa an programa kan LGU Naga na nagtatao nin tabang sa mga hobenes tanganing makapag-eskwela.

Segun ki del Rosario, dakulang tabang sa mga ti-os na pamilya an scholarship na pigtatao kan syudad sa saindang matatali o talented na mga aki, alagad pigheheling kan konsehal kun magkakanigo man na i-ayon sa scholarship kan syudad an mga aki na makusog na marhay an pagpursigi na makatapos nin pag-eskwela dawa dae nagin mapalad sa mga scholarship exams.

Sinabi kan konsehal na dakol nin mga aki na kan magdarakula na naging successful sa saindang buhay mantang dae man mabilang an mga nagin doctors, engineers, lawyers, asin professionals huli kan pagpursigi sa pag-adal.

Segun ki del Rosario, mas magayon kun dakol na siring na mga aki an matatawan pa nin tabang kan syudad sa tahaw kan pagmawot kan gobyerno lokal na paorogon pa an bilang nin mga Nagueñong progresibo asin asensado.