sangguniang panlungsod – CITY OF NAGA

“Pedestrianization project kan syudad tabang sa salud kan Nagueño” – Councilor del Rosasio

CEPPIO Naga — Fri, 21 Oct 2022 03:00:08 +0000

OGMA si City Councilor Joselito del Rosario huli ta kaibahan sa executive-legislative agenda (ELA) kan LGU Naga an pedestrianization projects na makakatao nin tabang sa mga Nagueño tanganing mapangatamanan an saindang mga salud.

Sinabi kan konsehal na huli kan pedestrianization o an paglaag nin mga lugar na kun saen maeenkaminar an mga tao na maglakaw pasiring sa saiyang papadumanan o simpleng pagpasyar sa paagi nin paglakaw-lakaw sa centro kan syudad.

Katuyuhan talaga kan pedestrianization iyo na matawan nin lugar an mga naglalakaw sa sentro nin marhay asin bwelong espasyo sa tahaw kan kasibutan kan mga behikulong nagbibyahe sa centro kan syudad.

Kaibahan pa sa ELA kan LGU Naga an pagdugang sa mga lugar na yaon sa laog kan syudad na pig-eenkaminar an pagbisekleta.

Segun ki Del Rosario sobra sa duwang taon na haros kadaklan sa mga tao mayo nin physical activities, kun kaya magkakanigo sanang matawan sinda nin panahon asin pagkakataon na makapag ehersisyo.

(Jason B. Neola, CEPPIO.)

Consultation meeting, ordinansa vs sexual exploitation of children

CEPPIO Naga — Tue, 23 Aug 2022 08:00:29 +0000

BOOT agapan kan lokal na gobyerno kan Naga an ano man na kaso nin online sexual exploitation of children na posibleng magbutwa sa laog kan syudad siring kan mga nangyayari na ngonian sa manlaenlaen na parte kan kinaban.

Segun ki Vice Mayor Cecilia de Asis, ibobosol niya muna an sarong consultation meeting na imbitado an cyber-crime units kan mga law enforcement agencies, Department of Education, prosecution office asin ibang concerned government and private agencies.

Pigpahayag kan bise-alkalde na sarong ordinansa an nakatalaan pandayon kan Sangguniang Panlungsod na igwang katuyuhan na tawan nin magkakanigong kaaraman an lambang pamilyang Nagueño laban sa pagmolestya nin mga kaakian gamit an online, tamang pagkoordinar o pag-report sa mga awtoridad kan siring na mga kaso, pagpahiwas nin kaaraman dapit sa online sexual exploitation kan mga aki, asin an mga padusa o penalidad na hahampangon huli kan pagiging imbwelto sa siring na krimen.

Piggigibo ngonian an nasambit na plano pagkatapos kan sarong seminar na pig-atendiran kan besi-alkalde dapit sa online sexual exploitation sa mga kaakian. An seminar pigbosol kan Juvenile Justice Mission, sarong ahensya na ipinaglalaban an karahayan asin buhay kan mga kaakian laban sa nasambit na krimen.

Pigsaysay ni de Asis na pigbuyagyag sa pig atendiran niyang seminar na mga paedophiles sa Amerika, Australia, asin Sweden an kadaklan sa mga imbweltong tao an nagdadalan kan mga video nin kaakian na ipinapaheling an mga maselan na parte kan saindang mga lumbod pang lawas.

Nasusog kan mga awtoridad na kadaklan sa mga videong pigpapaheling via online hali sa Pilipinas asin sa harong lang piggigibo. Sinabi ni de Asis na igwang mga insidente na nagsosobli sana nin aki sa laog kan saindang komunidad an kagharong para magkawat, alagad, idto palan piggagamit na sa negosyo sa paagi nin online sexual child exploitation.

Pag-abot sa barayadan, sinabi ni de Asis na pigpapadara na lang sa paagi nin online remittance an kwartang hali sa mga customers na paedophiles sa taong nagsu-supply kan video. Saro o duwang kaso nin siring na transaksyon sa Bikol an nai-record na kan mga awtoridad.

(Jason B. Neola, CEPPIO)

Consumer protection committee igwang aksyon vs presyo kan pork

CEPPIO Naga — Tue, 16 Aug 2022 09:30:30 +0000

AARAMON kan Committee on Consumer Protection kan Sangguniang Panlungsod kan Naga an rason kun taano ta pirming halangkaw an presyo kan karneng orig sa merkado. Huli kaiyan, gigibohon kan nasambit nang committee an sarong meeting kaibanan an mga stakeholders sa industriya nin orig.

Segun ki City Councilor Jesse Albeus, chairman kan committee on consumer protection, dakol sindang pigreresibeng reklamo asin mga hapot kun taano ta halangkaw an presyo kan nasambit na produkto kesa sa presyong pig-oopresir kan mga merkado sa pagtaraed na banwaan.

Sa Naga asin pagtaraed na banwaan, P130 hanggan P160 an kilo kan buhay na orig o an pig-aapod na live weight, alagad an presyo kan karneng orig (pork) sa Naga City People’s Mall asin sa mga satellite markets sa laog kan syudad, abot nang P320 sagkod P360 per kilo mantang sa luwas kan Naga, P260 hanggan P300 sana an kilo.

Pigtawan du-on ni Albeus na mandato kan saiyang komitiba na pangatamanan asin tawan nin proteksyon an mga konsumidores bako sana sa ngaran kan pagbakal nin marhay na produkto, alagad magin man sa presyo kan babakalon nindang produkto.

Segun pa sa konsehal, mantang pighahalat niya an executive order ni Mayor Nelson Legacion na iyo an babasehan sa liwat na pagbilog kan Naga City Price Coordinating Council, idadagos niya na an pag-aram sa istorya kan halangkaw na presyo nin pork sa laog kan Naga bilang chairman kan nasambit na komitiba.

Nakatalaan alokon ni Albeus na mag atendir sa meeting na gigibohon sa Byernes, alas 2:00 nin hapon an mga representante kan nagkakapirang mga opisina nin gobyerno asin pribadong grupo, siring kan Naga City Fresh Meat Vendors Association, an opisina rehiyunal kan Department of Agriculture sa Bicol, an National Meat Inspection Service, Market Enterprise and Promotion Office, Naga City Abattoir, asin an grupo nin mga konsumidores.

Pinakiolayan man ni Vice Mayor Cecelia de Asis si Albeus na ibali na an isyu dapit sa nagsasakat man na presyo nin manok asin sogoc.

(Jason B. Neola, CEPPIO.)