Huli kan kamawotan na syertohon an pagpangataman sa paz y orden sa tahaw kan kasibutan dara kan pagselebrar kan Peñafrancia fiesta, pigmarhay kan gobyerno lokal kan Naga asin kan Naga City Police Office (NCPO) na hagadon sa liderato rehiyunal kan Philippine National Police na padarahan an syudad nin augmentation force.

Laen kan augmentation force na sarong battalion, piglalakaw pa kan NCPO na mapadarahan an syudad nin mga patrol cars na magiging katuwang sa pagrekorida sa panahon kan pyesta.  An NCPO igwa nin total na 800 personnel.

Pigsyerto ni Police Lt. Col. Errol Garchitorena, deputy city director kan NCPO, na haman na an deployment plan kan mga police personnel kaibahan na an pagposte nin mga plainclothesmen sa mga lugar na kun saen masikad an mga civic asin religious events.

Sinabi pa kan opisyal na popoonan nang ilaag an joint operations center kaibahan an lokal na gobyerno kan syudad, an Archdioceses of Caceres asin mga support agencies tanganing makamtan asin mapangatamana an marhay asin matuninong na dalagan kan pyesta.

Pigtawan du-on ni Garchitorena na makusog na pigpapakiolayan kan syudad orog na an mga bisita na suportaran an mga guidelines o panundon (health protocols asin curfew) na ipinagpapaotob kan mga awtoridad para sa magian, marhay asin toltol na pagselebrar kan pyesta kan Nuestra Sra. De Penafrancia.

Pagiromdom pa ni Garchitorena na dae pa man nawawara an pandemya kun kaya magkakanigo lang na maglikay dawa yaon na sa alert level 1 an syudad nin Naga.