TANGANING mareyalisar na an itinutulod na pet cemetery sa syudad nin Naga, pinagmarhay kan Sangguniang Panlungsod na ipasar an resolusyon na nagtatao nin awtoridad ki Mayor Nelson Legacion na maki negosyar sa land owners na posibleng magpabakal o magdonar nin daga para sa nasambit na lubungan.

Segun ki Councilor Joselito Del Rosario, Chairman kan Committee on Public Utilities kan Sanggunian, ipinasar na kan konseho an Ordinance no. 2022-042 para sa pag establisar kan pet cemetery sa syudad asin ipangalad an basang na pag-apon sa basurahan, salog, magin pagsulo sa nagadan nang ataman na hayop.

Alagad susug sa saiyang pag-adal sa ordinansa dae pa nakakapasar an Sanggunian nin resolusyon para sa nasambit na katuyuhan.

Aminado si Del Rosario na sa presente padagos an paghalat kan saiyang komite sa mga persona na interesadong ipabakal o idonar sa lokal na gobyerno an saindang daga para sa pet cemetery.