Parte kan lagduan na pediatric vaccination program kan LGU Naga an pigbosol na barakunahan sa mga eskwelahan kan University of Nueva Caceres kan Byernes (Nov. 26) asin Ateneo de Naga University na ginibo kasobagong aga (Nov. 29).

Segun ki Erwin Oliver, safety officer kan UNC, abot sa 353 mga estudyantes ninda an ipinag sairarom sa child vaccination mantang pigsabi man ni Bro. Raymond Belleza na target ninda na mabakunahan an 360 na mga estudyantes sa Ateneo de Naga.

An pediatric vaccination o child vax pigtatao sa mga aki na yaon sa edad 12 sagkod 17 anyos.

Pigsaysay ni Dr. Butch Saulon, sarong UNC professor, na an pagbakuna sa mga kaakian iyo an pinakamarhay na magigibo sa panahon ngonian nin pandemya tanganing masyerto an karahayan kan saindang mga salud laban sa coronavirus disease.

Pigpahayag ni Belleza na an 360 Ateneo students haros kabanga pa sana kan interong bilang kan mga estudyantes nindang dapat mabakunahan. Pigpaliwanag kaini na dakol kaya sinda nin mga studyantes na residentes sa luwas kan syudad nin Naga.

Pigtawan du-on ni Belleza na sa Disyembre 1 haros 300 pang mga estudyantes na non-Naga residents an saindang isasairarom sa vaccination, alagad an nasambit na aktibidad gigibohon sa Bicol Medical Center.

An vaccination sa AdeNU padagos na piggigibo ngonian na hapon para sa out of school youths kan Barangay Tabuco asin estudyantes kan Sta. Cruz National High School.

Nagkaoyon kasoodma an lokal na gobyerno kan syudad asin an pamayo kan Department of Education sa Naga kabali na an mga school principals na i-oktaba muna an pediatric vaccination sa Naga City Mega Vaccination Site sa Jesse M. Robredo Coliseum.

Boot sabihon, dae muna gigiboohon an nakatalaan na vaccination sa aga, Byernes, Nobyembre 5, sa mga aki na yaon sa edad 12 sagkod 17 anyos tanganing tawan nin dalan an orientation o pagpasabot sa kaakian kan karahayan kan vaccination program asin pakikipag olay o pagkonsulta sa mga magurang.

Pig-oyonan pa man kan mga head of schools asin principals magin kan mga pribadong eskwelahan na gibohon school-based an child vaccination o an pagbosol nin pagbakuna sa mismong ekwelahan kan aki.

Nagtaong halimbawa si Mayor Nelson Legacion na kun an sarong aki taga Concepcion Pequeña, siya mapabakuna sa Concepcion Pequeña National High School siring man kun taga Barangay Tinago an aki, siya mapabakuna sa Tinago National High School.

Sa sitwasyon kan mga aking nag-aadal sa pribadong eskwelahan, pigsabi kan alkalde na sa saindang eskwelahan sinda mapabakuna, arog kan aki na nag eeskwela sa St. Joseph School School, siya babakunahan sa nasambit na eskwelahan.

Pigpaliwanag kan alkalde na tatawan nin prayoridad sa barakunahan an mga aki na nag eestar sa laog kan syudad nin Naga, pagkatapos na sinda mabakunahan dangan isusunod an mga aking nag eestar sa mga pagtaraed na banwaan.

Pigtawan du-on kan alkalde na mawot kan syudad na makumpleto tolos an pagbakuna sa 70 porsyento kan mga taga-Naga. Ini man an rason kun taano ta boot kan syudad na gibohon an vaccination magin sa mga eskwelahan asin bako lang sa JMR Coliseum.

Sa tahaw kaini, pigtawan pang du-on kan alkalde an nagpapadagos na Barangay Vaccination program, pwera pa kan mga barakunahan na piggigibo sa Naga College, Ateneo de Naga University, asin sa Unibersidad de Nueva Caceres.

Pigsaysay kan alkalde na maibobosol na toltol an child vaccination huli kan marikas, malinaw, asin turuwang na pagplano dapit sa bagay na ini. Sarong group chat kan mga pamayo nin mga pampubliko asin pribadong eskwelahan sa Naga an nakatalaan hamanon para sa paghanda sa mahiwas asin lagduan na child vaccination program.

Sa primerong pagkakataon, nakatalaan na gibohon an duwang magkasabay na vaccination program para sa kaakian sa Byernes, Nobyembre 5, ngonian na taon. Pigpiling pilot areas para sa pediatric vaccination an Naga City Mega Vaccination Site (Jesse M. Robredo Coliseum) asin an Bicol Medical Center.

Segun ki Dr. Joey Rañola, Infectious Disease specialist kan hospital, target ninda an 500 na mga aki sa laog kan enot na aldaw kan mass vaccination.

Boot ipaabot kan doktor sa mga magurang na kaipuhan igwa nin certification gikan sa pediatrician an saindang mga aki kun igwa nin comorbidity. Saro pang requirement tanganing matawan nin vaccine an siisay man na aki, kaipuhan igwa nin parent’s consent.

Sa lado kan syudad nin Naga, pigpahayag ni Dr. Butch Borja, city health officer, na an mga babakunahan na aki kaipuhan yaon sa edad poon 12 hanggan 17 anyos. Sinabi pa kaini na Pfizer asin Moderna vaccines an gagamiton siring kan pig-aprobaran kan Bureau of Food and Drugs Administration (BFAD).

An barakunahan na pigbobosol kan syudad pigpaplanuhan na gibohon sa mga public schools sa maarabot pang aldaw para sa mas mahiwas asin lagduan na coverage kan programa. Pigpahayag ni Borja na pigheheling ninda na pwedeng aboton sa 10,000 sagkod sa 12,000 na mga aki an mabenepisyo kan nakatalaan na barakunahan na regular nang gigibohon sagkod sa makumpleto an numero kan mga kaakian sa laog kan syudad.

Isasabay na man sa pagbakuna an mga magurang o guardians na dae pa bakunado tanganing masyerto an saindang pagiging ligtas.

Update sa vaccination program kan syudad, sa pinakahuring datos (October 25, 2021) sa 209,107 na Nagueño, 62,148 an nagresibe nan in first dose mantang 47, 059 an fully vaccinated.