MATRAYUMPONG naibaba kan City Population and Nutrition Office an numero kan undernourished children sa syudad nin Naga ngonian na taon.

Segun ki Ray-An Rentoy, pamayo kan nasambit na opisina, gikan sa 629 kaso kan undernourishment nagin 417 na sana susug sa pinakahuring datos.

Pigsabi pa ni Rentoy, an numerong nabawas sa 629 mga aking taga-Naga na maniniwang, kulang sa timbang asin langkaw rehabilitated sa tabang kan nourishment programs kan opisina asin kan National Nutrition Council.

Sa ibong kaini, padagos an nourishment program kan lokal na gobyerno para sa mga natadang 417 na mga aki bago matapos an taon.

Aminado si Rentoy na mas halangkaw an caso kan undernourishment sa mga aki sa syudad ngonian na taon kumpara sa labi 500 kan sarong taon alagad nagpaliwanag ini na kabale an stunting o pagkabansot bilang sintomas kan child undernourishment.

Dugang ni Rentoy, kadakle sa nanutaran na undernourished children sa sa syudad ngonian na taon, mga bansot.