Sa kamawotan na maenkaminar an partisipasyon kan mga Nagueño sa paggobernar asin masierto na padagos magin silag an implementasyon kan mga proseso sa pagservicio, hahamanon kan LGU Naga an sarong directory nin mga civil society organizations sa laog kan ciudad nin Naga.

An lakdang iyo an pighahagad sa implementing rules kan RA 7160 na igwang katuyuhan pakusogon an mga people’s organizations, NGOs, asin iba pang grupo sa sektor-pribado.

Sa pigpadrenuhan na resolosyon 2021-064 ni Konsehal Ghiel Rosales, hagad kaini an direktang pag-imbwelto kan nasambit na mga grupo sa paghaman nin mga plano, programa, proyekto asin pagkonducir nin mga aktibidad kan LGU, kaibahan na an pag-enkaminar sainda na magin miembros kan local special bodies, asin magin katabang sa pagheras sa publiko kan mga basic services.

Mandato kan DILG memorandum circular 2019-72 an pagtao nin accreditation o opisyal na pagmidbid sa civil society organizations kaibahan an pagkonducir nin imbentaryo na magigin basehan sa paghaman nin listahan o directory.

An Jesse M. Robredo Center for Good Governance an pigtokahan para magkonducir nin imbentaryo kan mga organisasyon kabale na an paghaman kan directory. Mandato kan JMRCGG na magserbing mekanismo sa pagpalakop nin kaaraman na magiging dalan tanganing mapauswag pa an marhay na paggobernar sa laog kan ciudad.

An pag-imbwelto sa civil society groups sa pagpadalagan kan lokal na gobyerno pigsususog sa kahagadan kan city ordinance 1995-092. An resolosyon na pigpadrenuhan ni Rosales pigpasar kan Sanggunian Panlungsod kan Enero 29, 2021 asin pig-aprobaran ni Alkalde Nelson Legacion kan Febrero 2, ngonian na taon.