IBOBOSOL na ngonian kan gobyerno lokal kan syudad nin Naga an “Operasyon Klaro,” na nakatalaan poonan sa Pebrero 4 sagkod 10.  Tampok kan proyekto an pagheras nin libreng check-up asin operasyon sa mata.

An Operasyon Klaro, pigtotolod kan syudad sa tabang kan mga eye specialist o mga ophthalmologist asin optometrists na gikan pa sa mga bistadong hospital sa Manila asin boluntaryong matao nin serbisyo siring kan pagsukol kan grado nin mata, pagtao nin mga reading glasses, asin pag-operar mismo kan mata nin pasyente.

Laog sa 1,500 na pasyente an pigtatarget na maserbihan sa lindong kan proyekto kabali na an mga pasyente na pwedeng matawan nin mga bolong para sa mata.

Sa ngonian naglilista na an mga personahes kan Persons with Disability Affairs Office (PDAO) nin mga taong boot magbenepisyo kan Operasyon Klaro. Inaabisohan an mga interesado na an paglista nin mga pasyente nakatalaan magtapos sa Enero 31, ngonian na taon.

Katuwang kan syudad nin Naga sa mission na ini an Madrigal Foundation, Ateneo de Naga University Nursing Department, City Health Office, asin an non-government organization kan  volunteer doctors na matao nin libreng serbisyo.