Bilang kasimbagan kan lokal na gobyerno sa uso ngonian na dengue pigmarhay kan City Health Office na darahon sa mga barangay health centers sa syudad nin Naga an mga dengue antigen test kits.

Segun ki Grace Guevara, medical technologists kan Social Hygiene Clinic, an pinakaharaning dudulukan kan mga Nagueño na nagsasapo nin mga sintomas kan dengue iyo an mga barangay health centers kun saen naghahalat an mga barangay health workers, na nag agi sa training, para sa pagkonduser kan nasambit na test.

Abiso ni Guevara sa mga pasyenteng nagsasapo nin halangkaw na kalintura, rashes, pagkulog nin tulak, obra-suka asin iba pang sintomas kan dengue na tolos magsairarom sa antigen test sa laog nin lima sagkod pitong aldaw makalihis tamaan nin mga sintomas.

Poon Enero sundo Hulyo, 2022, nag-abot na sa 133 an kaso kan dengue sa syudad nin Naga, mas halangkaw kumpara sa 102 na mga kaso kan 2021.