PASADO na sa second reading kan Committee on Peace and Order, Public Safety and Disaster Management an pigpoproponir na ordinansa na iyo an magigin basehan kan syudad sa gigibohon na road clearing operations kaini.

Ibobosol sa paagi kan ordinansa an pagtanggal kan mga illegal constructions, structures, asin mga bagay na nakakaolang sa mga pampublikong tinampo sa laog kan syudad nin Naga. 

Sinabi ni City Councilor Omar Buenafe, author kan ordinansa asin chairman kan Committee on Peace and Order, Public Safety and Disaster Management, na an ordinansa maserbing dagdag na ngipon kan gobyerno lokal para sa bwelong pag-implementar kan road clearing operations.

Mandato kan ordinansa na i-ayon an mga barangay officials asin mga barangay tanod sa pagpaotob kan road clearing sa saindang mga lugar.

Marurumduman, an road clearing operations sa laog kan syudad pigbosol kan enot pang taon sa paagi kan Naga City Road Network Development and Clearing Task Group na pigpamayuhan ni Alkalde Nelson Legacion.  “Alagad, kinakaipuhan na pakusogon pa an sinambit na espwerso sa paagi nin pagpanday nin sarong ordinansa,” sabi ni Buenafe.

Kabali sa tatagamahan kan fundong pighahagad sa ordinansa iyo an pagbakal kan syudad nin sadiring towing vehicle na mabotong sa mga lunadan na nakakaolang sa dalan.

Oyon an pigpapanday na ordinansa sa mandato kan City Ordinance 93-049 na midbid sa apod na Naga City Transport and Traffic Code asin sa peace and order and public safety (POPS) plan kan Naga para sa taon 2023-2025.