Nagsikad na an pagpatrabaho kan Centro Pedestrianization Project kasobagong aga, aldaw nin Lunes, Agosto 16, pagkatapos nin halipot na unveiling ceremony na pig atendiran kan nagkakapirang miembros kan mga sektor nin sosyodad asin mga opisyales kan Naga LGU asin mga barangay.

An proyekto na pigtawan nin fundong P18-M kan Department of Budget and Management (DBM) igwa nin katuyuhan na pakarayon, pagayonon asin gibohon na malinig o organisado an lugar na piglalakawan kan mga tao sa centro kan syudad.

Sa saiyang mensahe, pigtawan du-on ni Alkalde Nelson Legacion an importansya kan pagiging walkable city kan Naga na an boot sabihon inspirado o ganado an mga Nagueño na maglakaw sa laog kan centro huli ta magayon asin marhay an saindang piglalakawan na dalan.

“An proyektong ini bakong sa pagpapagayon lang naka-focus kondi siring man sa pag areglar kan mga espasyo sa gilid kan tinampo sa tahaw kan nagpaparadakol na lunadan asin pirming pagkagorobot kan trapiko,” sabi pa kan alkalde.

Kaibahan sa paghaman kan project, an pagpakarhay kan mga lugar na piggigibong parking spaces tanganing malikayan an pagsakop sa mga espasyo na parte kan main road asin an paglaag nin mga estraktura na mataong limpoy sa mga pasaherong naghahalat nin malulunadan sa mga designated sites.

Sa intrivista ki Alec Santos, pamayo kan Arts, Culture, and Tourism Office, resulta nin marhay na paggobernar asin paghingoha kan LGU an nagin dalan tanganing resibihon kan syudad an grant o financial assistance kan DBM.  An patrabaho piglalaoman na matatapos bago magbunkaras an taon kan 2022.

Pigsaysay ni Santos na laen kan magayon na sentro dara kan dugang na atraksyon, malilimitaran an gabat nin trapiko huli kan pagiging organisado kan lugar na igwang loading and unloading areas, salbadong dalan para sa mga pedestrians, PWDs, asin bikers mantang napapaboran man an negosyo asin turismo kan syudad.