Pigkanselar nguna kan Inter Agency Task Force an byahe haling rehiyon Bicol pasiring sa Manila kaibahan na an iba pang ciudad asin banwaan na sakop kan National Capital Region (NCR) huli ta an Bicol yaon sa Modified General Community Quarantine (MGCQ) mantang nasa Modified Enhance Community Quarantine an NCR.

Pigpahayag ni Roderick Reforsado, manager kan Bicol Central Station na magkakaigwa nin byahe an mga commercial buses sa aldaw na ipaotob na sa Manila an MGCQ.

Susog sa Memorandum Circular 2021-023 na pigpaluwas kan Land Transportation Franchising and Regulatory Board (LTFRB) kan Abril 10, ngonian na taon, an byahe haling Camarines Sur asin Ciudad nin Naga pasiring sa Manila asin iba pang lugar na sakop kan NCR nakatalaan kuta nang bukasan kasoodma, Abril 15, alagad nakalaag sa nasambit na kasuguan na an bubukasan na byahe para sana sa mga lugar na yaon sa GCQ asin MGCQ.

Huli kaiyan, dae kaibahan an mga bus na haling Bicol an makakapagbyahe pasiring sa Manila asin iba pang lugar sa NCR na yaon sa MECQ.

Naglalaom an mga Bicolano na sa pagbunkaras kan bulan nin Mayo, ngonian na taon, sa panahon na ideklara na magin MGCQ an Manila asin kainteruhan kan NCR, bubukasan man giraray para sa operasyon kan mga bus an byaheng Naga-Manila asin vice versa.

Sa ngonian, an BCS nagpapalarga lang nin mga bus na an byahe intra-province route o sa laog sana kan Camarines Sur asin inter-province route o byahe pasiring pagtaraed na provincia kan Camarines Sur siring kan Camarines Norte asin Albay.

Dapit sa mga byaherong boot maglaog sa Naga, pigpapaotob ngonian kan Bicol-IATF an reglamento na palusoton asin togotan sana na maglaog sa ciudad idtong mga pig aapod “essential” travelers asin dae totogotan na maglaaog an mga byaheros na gikan sa mga lugar na yaon sa ECQ asin MECQ status.