Naglalaom si Alkalde Nelson Legacion na mas mapapakarhay pa kan lokal na gobyerno an pagserbisyo kun lilipotan pa an proseso kan mga transaksyon sa arin man na opisina kaini o departamento.

Sa saiyang executive order 2023-005 pigbilog kan alkalde an Naga City Committee on Anti-Red Tape tanganing adalan kun paano mapaparikas pa an pagtao nin serbisyo sa tao kaibahan na an paghaman nin mga lakdang para matarasan an mga proseso sa arin man na transaksyon pasiring sa pagpauswag pa kan pagserbisyo, alagad sa paaging bakong atrasado.

Pigsabi ni Legacion na padagos an pagbosol kan LGU Naga sa lindong kan saiyang administrasyon an pagiging silag kan mga transaksyon na nangyayari sa lokal na gobyerno kaibahan na an pagsyerto para sa mas posog na gobyernong igwa nin paninimbagan sa publiko.

Mismong an alkalde an mamomoon o mamamayo kan komitiba bilang chairman kaibahan an administrador kan syudad bilang vice chairman asin mga pamayo kan manlaenlaen na departamento bilang mga myembros.

Pigngaranan sa orden ehekutibo an Internal Audit Service kan syudad tanganing magserbing secretariat na igwang mandatong magtao nin serbisyo teknikal asin administratibo.

An pigbilog kan komitiba pigbase sa kahorotan kan Anti-Red Tape Authority na nagmamanda sa mga opisina nin gobyerno na magmukna kan siring na komitiba.